لاہور، فیصل آباد، سیالکوٹ ، کامونکے، قصور، گوجرانوالہ، شکر گڑھ اور مرید کے سمیت پنجاب کے بیشتر شہروں میں چھٹی کے روز آندھی اور تیز ہواؤں کا زور رہا جس کے بعد متعدد شہروں میں تیز بارش اور بوندا باندی بھی ہوئی جس سے گرمی میں قدرے کمی ہوئی اور موسم خوشگوار ہوگیا۔ سادھوکی کے نواحی گاؤں میں آسمانی بجلی گرنے سے ایک بھائی جاں بحق اور ایک زخمی ہوگیا۔ گوجرانوالہ کے صابری ٹاؤن میں گھر کی دیوار گرنے سے پانچ افراد زخمی ہوگئے جنھیں ہسپتال منتقل کردیا گیا ہے۔
مرید کے کے علاقے بصرہ کالونی میں تیزآندھی کے باعث گھر کی چھت گرنے سے ایک خاتون جاں بحق ہوگئی۔موٹروے پر تیز آندھی کے باعث حادثے کے باعث کار سوار ایک شخص جاں بحق ہو گیا۔ فیروز والا میں بھی آندھی کے باعث گھر کی دیوار گرنے سے تین افراد ملبے تلے دب گئے۔ اسکردو اور خیبرپختونخوا کے بیشتر مقامات سمیت بالائی علاقوں میں بھی بارش ہوئی تاہم اندرون سندھ اور بلو چستان کے اکثر علاقے سورج کی تپش سے تپتے رہے۔