بری فوج کے سربراہ جنرل قمرجاویدباجوہ نے کل (اتوار) رات لارڈزمیں جنوبی افریقہ کے خلاف آئی سی سی عالمی کرکٹ کپ کے ایک اہم میچ میں کامیابی حاصل کرنے پر قومی کرکٹ ٹیم کی کارکردگی کو سراہاہے۔میچ دیکھنے کے بعد برطانیہ میں مقیم پاکستانی صحافیوں سے باتیں کرتے ہوئے، جنہوں نے ٹیم کی کارکردگی کے بارے میں انہیں ا پنے تاثرات کااظہارکرنے کے لئے کہا،بری فوج کے سربراہ نے کہاکہ ٹیم نے اچھے کھیل کامظاہرہ کیا۔جنرل قمرجاویدباجوہ نے کل اسٹیڈیم کادورہ کیا اور پاکستان اور جنوبی افریقہ کے درمیان دلچسپ میچ دیکھا، پاک فوج کے شعبہ تعلقات عامہ کے ڈائریکٹرجنرل میجرجنرل آصف غفوربھی ان کے ہمراہ تھے۔پاکستان کے لئے برطانیہ کے ہائی کمشنر تھامس ڈریو نے بھی ،جومیچ دیکھنے کے لئے بری فوج کے سربراہ کے ساتھ موجودتھے۔ جنوبی افریقہ کے خلاف کامیابی پرپاکستان کی کرکٹ ٹیم کومبارکباددی ہے۔