لاہور(سپورٹس رپورٹر)پاکستان کرکٹ بورڈ نے اپنے تمام ملازمین کی کرونا ویکسی نیشن کا آغاز کردیا۔پی سی بی ملازمین کی ویکسی نیشن کا عمل یکم جولائی تک مکمل ہوگا، پہلے مرحلے میں لاہور سے تعلق رکھنے والے پی سی بی ملازمین کی ویکسی نیشن ہوئی۔دیگر شہروں سے تعلق رکھنے والے ملازمین کی ویکسی نیشن رواں ماہ کے اختتام تک مکمل ہوگی۔پی سی بی اس سے قبل قومی کرکٹ ٹیم میں شامل کھلاڑیوں، سپورٹ سٹاف کی ویکسی نیشن کرواچکا ہے۔چیف آپریٹنگ آفیسر پی سی بی سلمان نصیر کا کہنا ہے کہ عالمی وبا کے باوجود پی سی بی کے تمام ملازمین نے بھرپور انداز سے اپنی پیشہ ورانہ ذمہ داریاں نبھائیں، جو کرکٹ سیزن برائے 21-2020 کی کامیابی کا سبب بنا۔انہیں خوشی ہے کہ پی سی بی نے اپنی قومی مینز کرکٹ ٹیم اور خواتین کرکٹ ٹیم کے کھلاڑیوں اور ان ٹیموں کے سپورٹ سٹاف ارکان کے بعد اب اپنے ملازمین کی کروناویکسی نیشن مکمل کرنے کافیصلہ کیا ہے۔سلمان نصیر نے کہاکہ اس عمل کے ذریعے ہم اپنے تمام ملازمین کو دفاتر میں مکمل حاضری سے قبل ایک محفوظ ماحول فراہم کرنا چاہتے ہیں تاہم اس دوران وہ مقررہ پروٹوکولز پرعملدرآمد کرتے رہیں گے۔