مظفرگڑھ،چوک سرورشہید ،میلسی ،وہاڑی (نامہ نگار)ٹریفک حادثات میں ایک لیڈی ڈاکٹر سمیت  تین  افراد جاں بحق ہوگئے ، 12 زخمی ریسکیو 1122 کیمطابق چوک منڈا میں نائی والا ٹبہ کے قریب 2 تیزرفتار ٹرک آپس میں ٹکراگئے،حادثے میں ایک ٹرک میں سوار 40 سالہ شخص بلال جاں بحق اور 2 افراد زخمی ہوگئے،ٹرک کی باڈی کاٹ کر لاش اور زخمیوں کو باہر نکالا گیا اور ہسپتال منتقل کردیا گیا،دوسرا حادثہ ہیڈ محمد والا کے قریب اڈا پٹھان ہوٹل کے نزدیک ہوا،جہاں تیزرفتار کار بے قابو ہوکر الٹ گئی،حادثے میں کار میں سوار 47 سالہ خاتون گل افشاں موقع پر ہی جاں بحق ہوگئی جبکہ اسکا شوہر اختر شدید زخمی ہوگیا۔ریسکیو نے مرنے والی خاتون کو ہسپتال منتقل کردیا۔وہاڑی ،میلسی سے نامہ نگار وں کے مطابق نجی کمپنی کی بس وہاڑی سے میلسی کی طرف جارہی تھی کہ ڈرائیور نے موٹر سائیکل سوار کو بچانے کی کوشش کی لیکن بس بے قابو ہوکرموٹر سائیکل سوار کو کچلتے ہوئے سڑک کے کنارے درخت سے جا ٹکرائی حادثہ میں 59 ڈبلیو بی کا رہائشی موٹر سائیکل سوار محمد الیاس موقع پر جاں بحق ہو گیا جبکہ بس ڈرائیور سمیت 8 افراد شدید زخمی ہوگئے ریسکیو 1122کے جوان حادثہ کی اطلاع ملتے ہی موقع پر پہنچ گئے معمولی زخمیوں کو موقع پر ہی ابتدائی طبی امداد فراہم کی جبکہ گاڑی میں پھنسے ہوئے تھے ڈرائیور کو 2گھنٹے کی مسلسل کوشش کے بعد بس کی باڈی کو کاٹ کر نکال لیا گیا تمام زخمیوں کوہسپتال منتقل کردیا گیا جہاں ان کا علاج جاری ہے۔