اسجد اقبال پروفیشنل سنوکر  میں شامل 

لاہور(سپورٹس رپورٹر)پاکستان کے اسجد اقبال کو پروفیشنل سنوکر ٹور میں شامل کرلیا گیا۔ پروفیشنل سنوکر کی عالمی تنظیم ورلڈ پروفیشنل بلیڈز سنوکر ایسوسی ایشن کے مطابق پاکستانی کیوئسٹ اسجد اقبال کو تھائی پلیئر کیخلاف ڈسپلنری کارروائی کے بعد شامل کیا گیا۔ڈبلیو پی بی ایس اے کی جانب سے جاری بیان میں کہا گیا ہے کہ پروفیشنل سنوکر کی عالمی تنظیم نے اگلے ٹور میں تھاناوات تیراپونگ بائیبون کو شامل نہ کرنے کا فیصلہ کیا ہے۔ کیونکہ تھائی پلیئر کیخلاف  2015 کے ٹور سے تحقیقات جاری ہیں۔ پاکستان کے اسجد اقبال کو تھائی پلیئر کی جگہ پروفیشنل ٹور میں جگہ مل گئی۔ اسجد اقبال کو ایشیا اوشیانا کیو سکول میرٹ لسٹ کی بنیاد پر ٹور میں شامل کیا گیا ہے۔اسجد اقبال نے ٹورنامنٹ میں تیسری پوزیشن حاصل کی تھی۔پاکستان کے محمد آصف نے بھی اس ایشیا اوشیانا کیو سکول ٹورنامنٹ کا فائنل کھیل کر ورلڈ پروفیشنل سنوکر ٹور کیلئے کوالیفائی کیا تھا۔پاکستان کے دو پلیئرزکیلئے ٹوور کیلئے کوالیفائی کرنے کے بعد اگلا چیلنج ٹور میں خود کو برقرار رکھنے اور تمام ٹورنامنٹس کھیلنے کیلئے فنڈز جمع کرنا ہے۔ ماضی میں پاکستان کے حمزہ اکبر مناسب فنڈز نہ ہونے کی وجہ سے ٹوور میں پوزیشن برقرار نہ رکھ سکے تھے۔پروفیشنل ٹور میں باضابطہ شمولیت کے بعد دونوں کھلاڑی ایمچور سنوکر کے ایونٹس کھیلنے کے اہل نہیں ہوں گے۔