لاہور(سپورٹس رپورٹر)افغانستان کرکٹ ٹیم کے کھلاڑی گلبدین نائب کا کہنا ہے کہ آسٹریلیا کیخلاف جیت ہماری کرکٹ کیلئے بڑی کامیابی ہے۔میچ کے بعد گفتگو کرتے ہوئے گلبدین نائب کا کہنا تھا کہ ہم ایک طویل عرصے سے اس کا انتظار کر رہے تھے، یہ نہ صرف میرے لیے بلکہ میری قوم اور میرے لوگوں کیلئے بہت اچھا لمحہ ہے۔یہ ہماری کرکٹ کیلئے ایک بڑی کامیابی ہے، ہمارے کیریئر اور کرکٹ کے سفر کو سپورٹ کرنے کیلئے شائقین کا شکریہ، یہ ایک بہترین ٹیم ورک ہے، ہم نے گزشتہ دو ماہ سے سخت محنت کی اور نتیجہ سامنے ہے۔ اگر آپ ہماری کرکٹ کی تاریخ کو دیکھیں تو یہ زیادہ نہیں ہے، پچھلے 10 سال میں ہم نے بہت سے اہداف حاصل کیے ہیں۔