لاہور+اسلام آباد (خصوصی رپورٹر+نوائے وقت رپورٹ) دنیا بھر میں گزشتہ روز ارتھ آور منایا گیا پاکستان سمیت دنیا بھر میں روشنیاں گل کر دی گئیں۔ صدارتی محل اور وزیراعظم ہاﺅس کی لائٹیں ارتھ آور شروع ہونے پر بند کر دی گئیں۔ لاہور میں اہم عمارتوں جاتی عمرہ کی لائٹس بند کر دی گئیں۔ کراچی میں ایم کیو ایم کے مرکز نائن زیرو سمیت اہم سرکاری عمارتوں کی لائٹیں بند کر دی گئیں۔ مزار قائد پر لائٹس بند کرکے شمعیں روشن کی گئیں۔ کراچی ائرپورٹ پر لائٹس بند کر دی گئیں۔ پشاور میں ائرپورٹ سمیت اہم عمارتوں کی لائٹس بند کرکے شمعیں روشن کی گئیں۔ ائرپورٹ پر موجود مسافروں نے بھی ارتھ آور کی تقریب میں شرکت کی۔ ارتھ آور منانے کا مقصد ماحولیاتی تبدیلی کے حوالے سے عوامی شعور اجاگر کر نا ہے۔