ورلڈ کپ میں کسی بھی ٹیم کو ہرا سکتے ہیں: عثمان شنواری

لاہور (نمائندہ سپورٹس)قومی فاسٹ باولر عثمان خان شنواری کا کہنا ہے کہ ورلڈ کپ میں قومی سکواڈ کسی بھی ٹیم کو ہرانے کی بھرپور صلاحیت رکھتا ہے اور سفید بال کی کرکٹ میں گرین شرٹس کو کسی بھی ٹیم سے کمتر نہیں کہا جا سکتا جن کی عالمی کرکٹ میں اپنی ایک اہمیت ہے۔ کرکٹ کے تینوں فارمیٹس میں بہت زیادہ فرق ہے اور دیکھا جائے تو قومی ٹیم کے پاس مختصر فارمیٹ کی کرکٹ کے لیے موثر بیٹسمین،عمدہ آل رائونڈرز اور بہترین فاسٹ بالرز موجود ہیں۔ چیمپئنز ٹرافی کی فاتح ٹیم ورلڈ کپ میں بھی یہی کارنامہ دہرا سکتی ہے کیونکہ انگلش کنڈیشنز میں کھیلنے کا اسے تجربہ بھی ہے۔رواں سال ہونے والا میگا ایونٹ آسان نہیں ہوگا اور انگلش میدانوں پر عالمی کرکٹ کی مضبوط ترین ٹیمیں ٹائٹل کے حصول کی جنگ لڑیں گی لیکن یقین ہے کہ دستیاب صلاحیت کے ساتھ پاکستانی ٹیم کوئی بھی سرپرائز کر سکتی ہے۔مستقبل میں آسٹریلیا اور جنوبی افریقہ جیسی ٹیموں کا مقابلہ کرنے کیلئے پاکستان میں ڈومیسٹک کرکٹ کا ڈھانچہ تبدیل کرنا ہوگا جو کافی بہتر تو ہے لیکن اس میں بعض سہولیات ناپید ہیں جو آسٹریلیا سمیت دیگر ممالک میں پلیئرز کو فراہم کی جاتی ہیں۔