گلیڈی ایٹرز نے یوم پاکستان کوئٹہ میں منایا‘ اعزاز میں تقریب

کوئٹہ + لاہور(بیورو رپورٹ+ نمائندہ سپورٹس+نوائے وقت رپورٹ) پاکستان سپر لیگ کی فاتح ٹیم کوئٹہ گلیڈی ایٹرز کوئٹہ پہنچ گئی ٹیم اونر ندیم عمر ،کپتان سرفراز احمد ،کوچ معین خان، اوپنر احمد شہزاد ودیگر پی ایس ایل فور کی چیمپئن ٹرافی لیے کوئٹہ پہنچے ،ہفتے کو کوئٹہ گلیڈی ایٹرز کی ٹیم کوئٹہ ایئرپورٹ پہنچی جہاں پر صوبائی وزرا ظہور بلیدی، عبدالخالق ہزارہ اراکین صوبائی اسمبلی بشریٰ رند، مبین خلجی، عبدالرشید بلوچ کمشنر کوئٹہ ڈویژن ،ایڈمنسٹریٹر میٹروپولیٹن کارپوریشن کوئٹہ ، ڈپٹی کمشنر اور ڈپٹی کمشنر جنرل کوئٹہ نے کوئٹہ گلیڈی ایٹرز ٹیم کا استقبال کیا،جبکہ ایئرپورٹ پر شائقین کرکٹ کی بھی بڑی تعداد موجود تھی جہنوں نے کھلاڑیوں پر پھول نچاور کیے، اور کوئٹہ کوئٹہ کے نعرے لگاتے ہوئے کھلاڑیوں کو ایئرپورٹ پر خوش آمدید کہا۔ایئرپورٹ پر میڈیا سے بات چیت کرتے ہوئے کوئٹہ گلیڈی ایٹر کے فرنچائزاونر ندیم عمر اور کپتان سرفراز احمد کا کہناتھا کہ پی ایس ایل فور میں چیمپئن ٹرافی جیت کر بلوچستان کے عوام تحفہ دیا، کوئٹہ کے عوام کرکٹ سے محبت کرنے والے لوگ ہیں، شاندار استقبال پر عوام کا شکریہ ادا کرتے ہیں، بلوچستان کے غیور عوام نے امن کیلئے بہت قربانی دی ہیں یہ جیت ہم ان کے نام کرتے ہیں، اگلے ایڈیشن میں کوئٹہ کے کھلاڑہوں کو کھیلنے کے مواقع فراہم کیے جائیں گے۔ پاکستان سپر لیگ فور کی فاتح ٹیم کوئٹہ گلیڈی ایٹرز کے اعزاز میں تقریب کا انعقاد کیا گیا۔ وزیراعلیٰ بلوچستان جام کمال نے خطاب کرتے ہوئے کہا کہ خوشی ہے کہ ٹیم نے پی ایس ایل فور کی ٹرافی جیتی۔ تمام کھلاڑیوں کا بے حد مشکور ہوں۔ صوبے کے نوجوانوں میں ٹیلنٹ کی کمی نہیں۔ پولو گراؤنڈ میں ہونے والی تقریب میں کمانڈر سدرن کمانڈ لیفٹیننٹ جنرل عاصم سلیم باجوہ‘کوئٹہ گلیڈی ایٹرز کے کپتان سرفراز احمد‘ احمد شہزاد‘ احسن علی اور انور علی نے شرکت کی۔ جام کمال نے فاتح ٹیم کے کھلاڑیوں کیلئے پانچ پانچ لاکھ روپے انعام کا اعلان کیا۔