گوجرانوالہ (نمائندہ خصوصی) ٹریکٹر ٹرالی اور رکشہ کے تصادم میں خاتون اور اس کے دو بیٹے جاں بحق جبکہ خاوند سمیت دو زخمی ہو گئے۔ تفصیلات کے مطابق دھلے کا رہائشی رکشہ ڈرائیور ندیم اپنی فیملی کے ہمراہ کیلا سکے سے سحری کے وقت گھر واپس جا رہا تھاکہ راستے میں ڈوگرانوالہ سیم نالہ کے قریب ٹریکٹر ٹرالی نے رکشہ کو ٹکر مار دی جس کے نتیجے میں رکشہ ڈرائیور کی اہلیہ رضیہ بی بی اور اس کے دو بیٹے طیب اور سبحان موقع پر جاں بحق جبکہ رکشہ ڈرائیور ندیم اور اس کی بھتیجی عنفہ شدید زخمی ہو گئے۔ ماں اور دو بیٹوں کی نعشیں گھر پہنچنے پر قیامت برپا ہو گئی۔ علاقہ کی فضا بھی سوگوار ہو گئی۔  کینٹ پولیس نے رکشہ ڈرائیور ندیم کی درخواست پر مقدمہ درج کر کے کارروائی کا آغاز کر دیا۔