لاہور۔ برمنگھم (سپورٹس ڈےسک ) انگلینڈ میں ہونے والی چیمپئنز ٹرافی کے لیے پاکستان کرکٹ ٹیم میں ان فٹ عمر اکمل کی جگہ حارث سہیل کو شامل کرلیا گیا۔چیف سلیکٹر انضمام الحق کی سربراہی میں قومی سلیکشن کمیٹی نے عمر امین، حارث سہیل اور آصف ذاکر کو نیشنل کرکٹ اکیڈمی میں فٹنس ٹیسٹ کے لیے طلب کیا۔نیشنل کرکٹ اکیڈمی کے ٹرینر نے تینوں کھلاڑیوں کا فٹنس ٹیسٹ لیا اور اس کے نتائج کی روشنی میں مڈل آرڈر بیٹسمین اور لفیٹ آرم اسپنر حارث سہیل کو عمر اکمل کی جگہ قومی ٹیم میں شمولیت کے لیے منتخب کیا گیا۔دوسری جانب عمر اکمل کو ہدایت کی گئی ہے کہ وہ وطن واپس جاکر اپنی فٹنس بہتر بنانے پر کام شروع کردیں۔۔پاکستان کرکٹ ٹیم کے چیف سلیکٹر انضمام الحق کا کہنا تھا کہ تمام کھلاڑیوں کو اپنا فٹنس لیول برقرار رکھنا ہوتا ہے، فٹنس برقرار نہ رکھنے پرعمر اکمل کو واپس بلایا گیا۔انضمام نے کہا کہ حارث سہیل اور عمر امین نے پاکستان کپ میں پرفارم کیا ہے، عمر اکمل کو فٹنس پر توجہ دینا ہوگی، وہ آسٹریلیا کے دورے میں بھی فٹ نہیں تھے۔۔ادھر پاکستان ٹیم مینجمنٹ کی جانب سے لئے گئے فٹنس ٹیسٹ میں ناکامی کے بعد عمر اکمل کا مستقبل کیا ہوگا؟ اس بارے میں قیاس آرائیوں کا سلسلہ جاری ہے۔البتہ دوسری طرف اس حوالے سے جب برمنگھم میں موجود ٹیم انتظامیہ سے رابطہ کیا گیا، تو انہوں نے مکمل طور پر لاعلمی ظاہر کرتے ہوئے کہا کہ ہمیں اس حوالے سے کوئی ہدایات موصول نہیں ہوئیں۔عمر اکمل بدستور ٹیم کے ہوٹل میں موجود ہیں، وہ کب پاکستان جائیں گے۔اس بارے میں میڈیا منیجر رضا راشد کا کہنا ہے، فی الحال کچھ پتہ نہیں ،جیسے ہی کوئی فیصلہ ہوا ،بتا دیں گے۔