امت مسلمہ کے عروج ، دنیا کو امن کا گہوارہ بنانے کیلئے سیرت مصطفی مشعل راہ ہے:علامہ شبیر قادری 

لاہور (خصوصی نامہ نگار)مجاہد ملت مولانا محمد عبدالستار خان نیازی ٹرسٹ کے مرکزی صدر علامہ شبیر قادری نے جامع مسجد گلزار مدینہ ٹاون شپ میں خطاب کرتے ہوئے کہا کہ امت مسلمہ کے عروج اور دنیا کو امن کا گہوارہ بنانے کیلئے سیرت مصطفی مشعل راہ ہے۔ انسانیت کو مسائل کی دلدل سے نکالنے کیلئے تعلیمات مصطفی دنیا کے کونے کونے میں پھیلانے کی اشد ضرورت ہے۔ اتباع رسول ہی خدا کی رضا ہے اتباع رسول میں ہی دنیا اور آخرت کی کامیابیاں مضمر ہیں۔محمد مصطفی ہی وہ واحد آئیڈیل شخصیت ہیں جن کی پیروی میں فلاح ہی فلاح ہے۔ دنیا کے بنائے ہوئے سارے نظام انسانیت کیلئے مصیبت سے کم نہیں محمد مصطفی کا نظام ہی انسانیت کو امن اور سکون عطا کر سکتا ہے۔ دنیا کو بالآخر اس نظام کی طرف لوٹنا ہوگا ۔سودی نظام معیشت نے ملکی معیشت کو تباہ و برباد کر دیا۔ سودی نظام معیشت کو ختم کرنے کیلئے حکومت فورا عملی اقدامات اٹھائے۔