اسلام آباد (خبر نگار خصوصی) آرمی چیف جنرل سید عاصم منیر سرکاری دورے پر جرمنی پہنچ گئے۔ آئی ایس پی آر کے مطابق جرمن وزارت دفاع میں چیف آف ڈیفنس جنرل کارسٹن بریور نے آرمی چیف کا استقبال کیا۔ آرمی چیف کو جرمن مسلح افواج کے دستے نے گارڈ آف آنر بھی پیش کیا۔ آئی ایس پی آر نے بتایا کہ آرمی چیف جنرل سید عاصم منیر کی جرمن فوج کے سربراہ لیفٹیننٹ جنرل الفونس ماس سے ملاقات ہوئی۔ آرمی چیف نے جرمن آرمی چیف کے ہمراہ آرمی کامبیٹ ٹریننگ سینٹر گارڈلیگن کا بھی دورہ کیا۔ آرمی چیف کو جرمن اور دیگر افواج کے دستوں کو دی جانے والی تربیت پر بریفنگ دی گئی۔ آرمی چیف نے اربن وار فیئرکا مظاہرہ دیکھا اور تربیتی مراکز کا دورہ کیا۔ آئی ایس پی آر کے مطابق آرمی چیف کی جرمن چانسلر کے خارجہ پالیسی اور سلامتی کے مشیر، جرمن وزیر مملکت برائے امور خارجہ اور وزارت دفاع کے سٹیٹ سیکرٹری سے بھی ملاقات ہوئی۔ جرمن قیادت نے دہشتگردی کے خلاف جنگ اور خطے میں امن و استحکام کے لئے پاک فوج کے کردار کا اعتراف کیا۔ اپنے دورے میں آرمی چیف جرمن آرمڈ فورسز کمانڈ اینڈ سٹاف کالج ہیمبرگ کا بھی دورہ کریں گے۔ سٹاف کالج میں آرمی چیف مختلف ممالک سے کورس میں شریک طلباء سے خطاب کریں گے۔ آرمی چیف اقوام متحدہ کے مشن میں پاکستان کی مسلح افواج کے کردار پر روشنی ڈالیں گے۔