بادامی باغ: مبینہ پولیس مقابلہ، 3 ڈاکو زخمی، دیپالپور میں 2 خطرناک ملزم ہلاک 

لاہور؍ اوکاڑہ (نامہ نگاران) دیپالپور میں پولیس مقابلے میں دو ڈاکو اپنے ساتھیوں کی فائرنگ سے ہلاک ہو گئے جبکہ لاہور میں بادامی باغ مچھلی منڈی کے قریب مبینہ پولیس مقابلے میں 3ڈاکو اپنے ساتھیوں کی فائرنگ سے زخمی ہوگئے۔ پولیس نے  5 موٹرسائیکل سواروں کو روکنے کی کوشش کی جس کے جواب میں ڈاکوئوں نے پولیس کو دیکھتے ہی فائرنگ شروع کردی۔ 3 ڈاکو اپنے ساتھیوں کی فائرنگ سے زخمی ہوئے اور  گرفتار کرلیے گئے۔  زخمی ڈاکوئوں کی شناخت عثمان، راحیل اور فیضان کے نام سے ہوئی۔ پولیس کے مطابق ملزمان ڈکیتی، چوری جیسی درجنوں وارداتوں میں ریکارڈ یافتہ ہیں، ملزمان کے قبضہ سے غیر قانونی اسلحہ اور چھری برآمد ہوئی ہے۔ دریں اثناء تھانہ صدر دیپالپور پولیس دو خطرناک ڈاکوؤں ناصر اور اورنگزیب کو ریکوری کے لیے لے کر جا رہی تھی، 47 ڈی کے قریب موٹر سائیکل سوار ان کے مسلح ساتھیوں نے پولیس پارٹی پر فائرنگ کرتے ہوئے دونوں ساتھیوں کو چھڑا لیا  اور پولیس پارٹی پر فائرنگ شروع کر دی۔ جوابی فائرنگ میں دو خطرناک ڈکیت ناصر اور اورنگزیب ہلاک ہو گئے۔  دونوں ڈاکوئوں نے چند ہفتے قبل دوران ڈکیتی واردات خاتون کو زیادتی کا نشانہ بنایا تھا۔