چکوال(مہران ظفر ملک)تھانہ سٹی پولیس چکوال نے ایک اہم کارروائی کے دوران تین مرلہ سکیم اسٹیڈیم کے قریب سے ڈکیتی کی منصوبہ بندی کرنے والے 5 مسلح ملزمان کو گرفتار کر لیا۔ مخبر کی اطلاع پر کارروائی کرتے ہوئے ڈی ایس پی صدر سرکل کی سربراہی، ایس ایچ او تھانہ سٹی چکوال راجہ فیصل ندیم کی قیادت میں اسسٹنٹ سب انسپکٹر ساجد علی نے اپنی ٹیم کے ہمراہ بروقت چھاپہ مارا اور ملزمان کو گرفتار کر لیا۔ گرفتار ملزمان کی شناخت عبید اللہ  ساکن ضلع میانوالی، دلاور عباس ساکن ڈھڈیال، امداد حسین ساکن ضلع مظفر گڑھ، کامران علی، اور ثاقب رضا ساکنان دھیدوال کے طور پر ہوئی ہے۔ ملزمان کے قبضے سے تین پستول اور دو موٹر سائیکل برآمد کی گئیں۔ پولیس کے مطابق ملزمان کے خلاف غیر قانونی اسلحہ رکھنے کے تحت الگ مقدمات بھی درج کر لیے گئے ہیں اور مزید تفتیش جاری ہے۔