کراچی ( کرائم رپورٹر+صباح نیوز) کراچی کے علاقہ منگھو پیر میں دہشت گردوں کے ساتھ مقابلے کے نتیجے میں رینجرز کا جوان شہید ہو گیا۔ گلستان جوہر میں رینجرز اہلکاروں کے مبینہ جھگڑے میں ایک اہلکار جاں بحق ہو گیا ۔ ذرائع کے مطابق رینجرز نے دہشت گردوں کی موجودگی کی اطلاع پر منگھو پیر کے علاقہ میں کارروائی کی۔ دہشت گرد رینجرز کی آمد پر بھاگ کھڑے ہوئے۔ تعاقب کے دوران ملزموں نے خود کار ہتھیاروں سے فائرنگ کر دی جس کی زد میں آ کر رینجرز کا ایک جوان شہید ہو گیا۔ ملزم اندھیرے کا فائدہ اٹھاتے ہوئے فرار ہو گئے۔ پولیس نے واقعہ سے لاعلمی کا اظہار کیا۔ ترجمان رینجرز کی جانب سے بھی واقعہ کے حوالے سے کوئی بیان جاری نہیں کیا گیا۔ دوسری جانب گلستان جوہر میں رینجرز اہلکاروں کے مبینہ جھگڑے میں ساتھی کی فائرنگ سے ایک اہلکار جاں بحق ہو گیا۔ ذرائع کے مطابق فائرنگ کا واقعہ گلستان جوہر بلاک17 میں پیش آیا، زخمی رینجرز اہلکار کو صبح 6 بج کر 35 منٹ پر جناح ہسپتال لایا گیا تھا، اسے سینے پر 3 گولیاں لگی تھیں۔ جاں بحق رینجرز اہلکار کی شناخت معشوق علی کے نام سے ہوئی ہے۔