لاہور (سپورٹس رپورٹر+نمائندہ سپورٹس) لاہور پولو کلب کے زیراہتمام لولوسرپولو ان پنک کپ 2020ء گلوبل ایونٹ آف پنک ربن کے چوتھے روز دوسرے سیمی فائنل میں ذکی فارمز نے ماسٹر پینٹس کو ہرا کرمین فائنل کیلئے کوالیفائی کر لیا۔ گارڈ گروپ نے دو چکرز کے میچوں میں دونوں میچ جیت کر سب سڈری فائنل کیلئے کوالیفائی کر لیا۔ ماسٹر پینٹس اور ذکی فارمز کی ٹیموں کے درمیان میچ تیسرے چکر تک برابر ہی رہا جبکہ چوتھے چکر میں ذکی فارم کی ٹیم نے گول کرکے میچ جیت لیا۔ ذکی فارمز کی طرف سے شاہ قبلائی عالم نے دو، ہاشم کمال آغا اور نذر دین نے ایک ایک گول سکور کیا۔ ماسٹر پینٹس کی طرف سے تینوں گول عدنان جلیل اعظم نے سکور کیے۔ ادھرسب سڈری فائنل کیلئے گارڈ گروپ، میجک ریور اور اے او ایس کے درمیان دو دو چکرز کے میچز کھیلے گئے۔ گارڈ گروپ نے پہلے اے او ایس کی ٹیم کو 4-2.5 سے، پھر گارڈ گروپ نے میجک ریور کو 4-1.5 سے ہرا دیا جبکہ تیسرے میچ میں میجک ریور نے اے او یس پولو ٹیم کو 4-2.5 سے ہرا دیا۔ اس طرح گارڈ گروپ کی ٹیم نے سب سڈری فائنل کیلئے  کوالیفائی کرلیا۔ اتوار 25 اکتوبر کو ایونٹ کے فائنل اور سب سڈری فائنل کھیلے جائیں گے۔