برلن (سپورٹس ڈیسک) جرمن فٹبال لیگ میں کھیلے گئے دلچسپ میچ میں بائرن میونخ نے وولفس برگ کو ایک کے مقابلے میں پانچ گولز سے ہرا دیا ۔ بائرن میونخ اور پولینڈ کے سٹرائیکر رابرٹ لیونڈوسکی نے جرمن فٹ بال کی تاریخ میں تیز ترین ہیٹرک کا نیا عالمی ریکارڈ قائم کر دیا۔ رابرٹ نے جرمن فٹ بال لیگ میں وولفزبرگ کے خلاف میچ میں تین منٹ اور 19 سیکنڈز میں تین گول کر کے یہ سنگ میل عبور کیا۔ میونخ کے اسٹرائیکر لیونڈوسکی نے نو منٹس میں 5 گول سکور کر کے اپنی ٹیم کو فتح سے ہمکنار کرایا، اس کے ساتھ ساتھ انہوں نے تیز ترین ہیٹرک کا عالمی ریکارڈ بھی اپنے قبضے میں کیا، وہ ایک گول کے فرق سے ڈائٹر کے سنگل میچ میں زیادہ گولز کا عالمی ریکارڈ برابر کرنے میں ناکام رہے، ڈائٹر نے 1977ء میں جرمن فٹ بال لیگ کے دوران سنگل میچ میں 6 گول سکور کئے تھے۔