گوجرانوالہ چیمبر الیکشن‘ فاؤنڈرز گروپ کارپوریٹ کلاس کی تمام نشستوں پر کامیاب

گوجرانوالہ (نمائندہ خصوصی) گوجرانوالہ چیمبر آف کامرس الیکشن کا پہلا مرحلہ مکمل‘ فائونڈرز یونٹی گروپ کا کلین سویپ‘ کارپوریٹ کلاس کی سات کی سات نشستیں جیت لیں۔ ون یونٹی گروپ کوئی سیٹ حاصل نہ کر سکا۔ تفصیلات کے مطابق گوجرانوالہ چیمبر آف کامرس کے سالانہ انتخابات کے سلسلہ میں گزشتہ روز ایگزیکٹو ممبران کارپوریٹ کلاس کیلئے ووٹنگ ہوِئی۔ چیمبر کے ارکان نے صبح نو سے شام پانچ بجے تک پر امن ماحول میں ووٹ کاسٹ کئے۔ چیمبر الیکشن میں دونوں گروپوں کی طرف سے اپنی جیت کے دعوے کئے جا رہے تھے لیکن الیکشن نتائج نے فائونڈرز کے دعوے سچ ثابت کر دئیے اور کارپوریٹ کلاس کی تمام سات کی سات نشستیں جیت لیں۔ میاں عمر سلیم نے503‘ محمد اصغر496‘ عطا فرید487‘ ملک محمد سفیان ایوب480‘ وسیم احمد477‘علی اظہار469‘ ذیشان انور461 ووٹ حاصل کر کے کامیاب قرار پائے جبکہ مخالف ون یونٹی گروپ کی طرف سے محمد اجمل اعوان 359‘ عبدالرئوف342‘ محمد عارف سلیم351‘ نویل امین358‘ حسن نوید رانجھا356‘ عابد منیر343 اور ارشد محمود 328 ووٹ حاصل کر سکے۔ فائونڈرز گروپ ملک ظہیر الحق نے خطاب کرتے ہوئے کہا کہ ہماری کامیابی پوری بزنس کمیونی کی فتح ہے۔