کراچی(اسپورٹس رپورٹر)تیسرا چیف آف دی نیول اسٹاف آل پاکستان ہاکی ٹورنامنٹ 21 سے 28 ستمبر تک عبدالستار ایدھی ہاکی اسٹیڈیم ، کراچی میں کھیلا جا رہا ہے۔ ٹورنامنٹ کے تیسرے دن تین میچ کھیلے گئے۔ دن کے پہلے میچ کے دوران ماڑی پٹرولیم کمپنی لمیٹڈ نے پورٹ قاسم اتھارٹی کو 7-1 سے شکست دی۔ ماڑی پٹرولیم کمپنی لمیٹڈ کے وسیم اکرم کو شاندار کارکردگی پر مین آف دی میچ کا ایوارڈ دیا گیا۔ دوسرا میچ واپڈا اور پاک فضائیہ کی ٹیموں کے درمیان کھیلا گیا جس میں واپڈا نے پاک فضائیہ کو 3-2 سے شکست دی۔ واپڈا کے محمد علیم بلال کو ان کی مہارت کے شاندار مظاہرے پر مین آف دی میچ کا ایوارڈ ملا۔ دن کے آخری میچ کے دوران نیشنل بینک آف پاکستان اور پنجاب کی ٹیمیں ایک دوسرے کے مدمقابل تھیں جس میں نیشنل بینک آف پاکستان نے پنجاب کی ٹیم کو 4-0 سے شکست دی۔ نیشنل بینک کے محمد دلبر نے بہترین کارکردگی پر مین آف دی میچ کا ایوارڈ حاصل کیا۔