شعیب ملک اورثانیہ مرزا اتوار کی صبح لاہورسے سیالکوٹ پہنچے تاہم ان کی لاہور سے روانگی اور سیالکوٹ آمد کو خفیہ رکھا گیا۔ استقبالیہ تقریب آج رات آٹھ بجے شروع ہوگی جس میں ملک کی معروف سیاسی، سماجی اور مذہبی شخصیات کے علاوہ دونوں میاں بیوی کے رشتہ داروں کی بھی ایک کثیر تعداد شرکت کرے گی۔ شعیب اور ثانیہ کی سیالکوٹ آمد پر شہرکو خوبصورتی سے سجایا گیا ہے جبکہ جگہ، جگہ استقبالیہ اور خیرمقدمی بینرز لگائے گئے ہیں۔ پورے شہر میں جشن کا سماں ہے، شہرکی گلیوں میں بچے اور نوجوان ڈھول کی تھاپ پر رقص کرتے دکھائی دیتے ہیں۔ پولیس نے اس سلسلے میں فول پروف اقدامات کئے ہیں، ڈسٹرکٹ پولیس آفیسر وقار احمد چوہان کا کہنا ہے کہ استقبالیہ تقریب کے کامیاب انعقاد کے لئے ہرطرح کے انتظامات کر لئے گئے ہیں۔