وزیر اعظم کی رابطہ مہم کا شیڈول تیاری ڈی آئی خان میں راہداری کے مغربی روٹ سوات ہسپتال کا افتتاح کرینگے

اسلام آباد/ مری (خبرنگار خصوصی+ آن لائن) وزیراعظم نواز شریف کی آئندہ ہفتے سے ترقیاتی منصوبوں کے افتتاح اور عوامی رابطہ مہم کے شیڈول کو حتمی شکل دیدی گئی‘ ڈیرہ اسماعیل خان میں اقتصادی راہداری کے مغربی روٹ‘ سوات میں کڈنی ہسپتال‘ بنوں اور کوہاٹ میں ایئرپورٹس کے توسیعی منصوبے‘ بلوچستان میں تعلیمی اداروں‘ ملتان خانیوال موٹر وے کا افتتاح کریں گے۔ ذرائع کے مطابق وزیراعظم خیبر پی کے سے عوامی رابطہ مہم کا آغاز کریں گے اور موٹروے کے توسیعی پراجیکٹ اور دیگر ترقیاتی منصوبوں کا افتتاح کریں گے۔ نواز شریف ڈیرہ اسماعیل خان میں اقتصادی راہداری کے مغربی روٹ کے افتتاح کے بعد سوات جائیں گے جہاں وہ شریف خاندان کے تعمیر کردہ کڈنی ہسپتال کا افتتاح کریں گے۔ وزیراعظم سوات کے بعد بنوں اور کوہاٹ میں ایئرپورٹس کی توسیع کے منصوبوں کا افتتاح کریں گے۔ خیبر پی کے کے بعد وزیراعظم سندھ کا رخ کریں گے اور سکھر اور دیگر اضلاع میں عوامی اجتماعات سے خطاب اور مختلف ترقیاتی منصوبوں کا اعلان کریں گے۔ سندھ کے بعد وزیراعظم بلوچستان کے دورے پر کوئٹہ جائیں گے جہاں وہ تعلیمی اداروں سمیت دیگر منصوبوں کا افتتاح کریں گے۔ آخر میں وزیراعظم نواز شریف پنجاب میں ملتان خانیوال موٹر وے کے توسیعی منصوبے کا افتتاح کریں گے۔ ذرائع کے مطابق وزیراعظم آئندہ ہفتے مانسہرہ اور ہزارہ میں عوامی اجتماعات سے خطاب کرینگے۔ آن لائن کے مطابق وزیراعظم محمد نواز شریف آج پیر کو کوٹلی ستیاں کا دورہ کریں گے جہاں وہ عوامی اجتماع سے خطاب اور بارش اور لینڈ سلائیڈنگ سے متاثرہ افراد میں امدادی چیک تقسیم کریں گے۔ مری‘ کوٹلی ستیاں میں سوئی گیس سمیت دیگر ترقیاتی منصوبوں کا اعلان بھی متوقع ہے۔