کپتان نے پیپلز پارٹی کی اہم وکٹ اڑا دی، ندیم افضل چن ساتھیوں سمیت پی ٹی آئی میں شامل ہوگئے، ندیم افضل چن نے منڈی بہاﺅالدین میں جلسے کے دوران پی ٹی آئی میں شمولیت اختیار کی۔ جلسے سے خطاب کرتے ہوئے عمران خان کہا کہ تب تک وفاداری کی جائے جب تک وہ راہِ حق پر ہیں، وہ منی لانڈرنگ کریں اور کارکن پھر بھی وفاداری کریں تو وہ اللہ کی پکڑ میں آئیں گے ۔ انہوں نے کہا کہ آج تک تمام پالیسیاں حکمران طبقے نے اپنے فائدے کیلئے بنائیں ، ہم ایسا نظام لائیں گے جو کمزور طبقے کو اوپر لائے گا، نیا پاکستان وہ ہے جہاں کمزور طبقے کو حقوق دیے جائیں، کمزوروں کی مدد کرنا ہمارے دین میں ہے، کوئی قوم اس وقت تک ترقی نہیں کر سکتی جب تک وہ کمزور طبقے کیلئے کھڑی نہ ہو۔ عمران خان کا کہنا تھا کہ ،پاکستان میں کاشتکاروں کو استحصال کیا جاتا ہے، کسانوں کو ان کا حق نہیں ملتا، ہم نے اس ظلم کو ختم کرنا ہے، عوام سے کیے گئے اپنے تمام وعدے پورے کریں گے۔ ندیم افضل چن کی پی ٹی آئی میں شمولیت پر کپتان نے کہا کہ ان کی پی ٹی آئی میں شمولیت سے پوری پارٹی خوش ہے، انہیں بہت پہلے پی ٹی آئی میں آجانا چاہیے تھا، ان کی شمولیت علاقے کے لوگوں کیلئے درست ثابت ہوگی ۔