کرکٹ ایسوسی ایشن کے کوچز کی کارکردگی کا آج جائزہ لیا جائیگا 

لاہور (سپورٹس رپورٹر)چھ کرکٹ ایسوسی ایشنز کے کوچز کی کارکردگی کا جائزہ لینے کیلئے تین روزہ سیشن کا پیر سے نیشنل ہائی پرفارمنس سنٹر لاہور میں آغاز ہوگا۔اس دوران ڈومیسٹک کرکٹ کی فرسٹ اور سیکنڈ الیون کی ٹیموں کے مجموعی طور پر 24 کوچز کی کارکردگی کا جائزہ لیا جائے گا۔پیر اور منگل کو ان تمام کوچز کے انٹرویوز لیے جائیں گے، جس کیلئے ایک باضابطہ کمیٹی تشکیل دی گئی ہے۔ اس کمیٹی میں عمر رشید، شاہد محبوب اور سجاد اکبر شامل ہیں۔تیسرے اور آخری روز ایک سیمینار منعقد کیا جائے گا، جہاں ان کوچز کے ڈومیسٹک سیزن 23-2022 کیلئے اہداف مقرر کیے جائیں گے۔ ان کوچز کیلئے منعقدہ سیمینار میں این ایچ پی سی کے کوچز اور ڈائریکٹر ہائی پرفارمنس ندیم خان بھی شرکت کریں گے۔