سچن ٹنڈولکر ، برائن لارا کیلئے سڈنی کرکٹ گرائونڈ میں اعزاز کا اعلان

سڈنی ( سپورٹس ڈیسک) آسٹریلیا نے عظیم کرکٹرز سچن ٹنڈولکر اور برائن لارا کیلئے سڈنی کرکٹ گرائونڈ میں اعزاز کا اعلان کیا۔اس حوالے سے کرکٹ آسٹریلیا نے کہا ہے کہ سڈنی کرکٹ گرائونڈ کے 2 گیٹ عظیم کرکٹرز کے ناموں سے منسوب کر دیئے گئے ہیں۔کرکٹ آسٹریلیا نے کہا کہ سچن ٹنڈولکر کی 50ویں سالگرہ کے موقع پر اور برائن لارا کی ایس سی جی میں 277رنز کی اننگز کو 30 سال مکمل ہونے پر اعزاز دیا گیا ہے۔مہمان ٹیم کے کھلاڑی گراونڈ میں لارا ٹنڈولکر گیٹس سے داخل ہوں گے جبکہ آسٹریلیا کرکٹ ٹیم سر ڈان بریڈ مین گیٹ سے گراونڈ میں داخل ہوتی ہے۔سابق بھارتی سٹار بیٹر سچن ٹنڈولکر نے کہا ہے کہ بھارت سے باہر ایس سی جی میرا فیورٹ گراونڈ ہے، میری اس گرائونڈ کے ساتھ بڑی یادیں وابستہ ہیں۔سچن ٹنڈولکر کا کہنا تھا کہ اعزاز کی بات ہے کہ مہمان ٹیمیں میرے اور میرے قریبی دوست برائن کے نام سے منسوب گیٹ استعمال کریں گی۔