لاہور(سپورٹس رپورٹر) 18 ویں ایشین گیمز میں شریک پاکستانی دستے کے کھلاڑیوں اورآفیشلز نے عیدالاضحی کی نمازایتھلیٹ ویلج میں ادا کی۔ عید نماز میں پاکستان اولمپک ایسوسی ایشن کے صدر جنرل عارف حسن، سیکرٹری جنرل محمد خالد محمود، قومی دستے کے چیف ڈی مشن سید عاقل شاہ، پاکستان ہاکی ٹیم کے منیجر حسن سردار، کپتان محمد رضوان سینئر و دیگر اسلامی ممالک کے کھلاڑیوں اورآفیشلز کی ایک بڑی تعداد نے شرکت کی۔ اس موقع پر عالم اسلام کے تمام مسلمانوں کی سلامتی اور خوشحالی کیلئے خصوصی دعائیں کی گئیں نماز عیدکے بعد کھلاڑیوں اور آفیشلز نے گلے مل کرایک دوسرے کو عیدالاضحی کی مبارکبادیں دیں۔ پاکستان اولمپک ایسوسی ایشن کیجانب سے تمام پاکستانیوں کوعیدکی مبارکباددیتے ہوئے جنرل عارف حسن نے کہا کہ عیدالاضحی ہمیں ایثار، قربانی اور برداشت کا درس دیتی ہے بحیثیت پاکستانی قوم ہم سب کا فرض ہے کہ ملک کی سالمیت اوربقاء کیلئے اپنا بھرپورکردار ادا کریں عیدکی خوشیوں میں غریب اور مستحق افرادکو ضرور شامل کریں قوم اپنی دعاوں میں ایشین گیمز میں شریک پاکستانی کھلاڑیوں کی کامیابی کیلئے خصوصی دعائیں کرے۔ پاکستان ہاکی ٹیم کے منیجرحسن سردار نے اس موقع پرقوم کے نام اپنے پیغام میں کہا کہ عیدکے پرمسرت موقع پر اپنے وطن سے دور ضرور ہیں مگر ہمارے دل اپنے ہموطنوں کے ساتھ ہیں۔