لاہور (نامہ نگار) گریٹر اقبال پارک میں ٹک ٹاکر خاتون سے دست درازی کیس میںتفتیشی ٹیم نے یوم آزادی پر پہنے ہوئے متاثرہ خاتون عائشہ اکرم کے کپڑے تحویل میں لے لئے ہیں۔ پولیس ذرائع کے مطابق کپڑے فرانزک کے لئے بھجوائے جائیں گے اور  ملزمان کے فنگر پرنٹ حاصل کئے جائیں گے۔ دریں اثناء پولیس نے گزشتہ روز بھی گرفتار افراد کی شناخت کے لئے متاثرہ لڑکی عائشہ اکرم کے سامنے پیش کیا۔ جس پر متاثرہ لڑکی عائشہ اکرم نے مزید دو ملزمان کی شناخت کی ہے۔ علاوہ ازیں پولیس کی جانب سے اس واقعہ میں ملوث ملزمان کی گرفتاری کے لئے گزشتہ روز بھی مختلف اضلاع میں چھاپوں کا سلسلہ جاری رکھا اور مزید 13 افراد کو حراست میں  لے کر تفتیش کی جا رہی ہے۔ رحیم یار خان سے کرائم رپورٹر کے مطابق گزشتہ روز لاہور پولیس نے نواحی قصبے کھائی خیر شاہ کی بستی قباء ارائیں میں چھاپہ مارکر امان اللہ نامی نوجوان کو گرفتار کر لیا۔ امان اللہ کے ورثاء نے بتایا کہ امان اللہ کبھی لاہور گیا ہی نہیں ہے۔ تاہم پولیس ذرائع نے بتایا کہ امان اللہ کے نام کی موبائل سم کا استعمال ہوا ہے۔