سیلاب سے پیداہونیوالی صورتحال اندوہناک اور تشویشناک ہے:شوکت ورک

لاہور(کامرس رپورٹر) دین فاؤنڈیشن کے مرکزی چیئرمین اورڈاکٹر اے کیوخان ہسپتال ٹرسٹ کے بانی ٹرسٹی و جنرل سیکرٹری ڈاکٹر شوکت بابر ورک نے کہا ہے کہ سیلاب سے بلوچستان اورجنوبی پنجاب میں پیداہونیوالی صورتحال اندوہناک اور تشویشناک ہے۔مصیبت زدگان اورہم ایک خاندان ہیں،ہم میں سے کوئی ان کی بحالی تک چین سے نہیں بیٹھے گا۔اس بار بھی پاک فوج کی امدادی سرگرمیاں مستحسن ہیں،افواج پاکستان کے نڈرسپہ سالار جنرل قمرجاویدباجوہ کادل اپنے ہم وطنوں کے ساتھ دھڑکتا ہے۔اوورسیز پاکستانیوں کواپنے مصیبت زدہ ہم وطنوں کی مدد کیلئے کہنا نہیں پڑتا۔ ڈاکٹر شوکت بابر ورک نے کہا کہ کئی ملین مصیبت زدگان بے سروسامانی کی حالت میں ہماری فوری مدد اوربھرپورکفالت کے منتظر ہیں۔انہوں نے کہا کہ ڈاکٹر اے کیوخان ہسپتال ٹرسٹ کے ڈاکٹرز اور پیرامیڈیکل سٹاف سیلاب کے نتیجہ میں مختلف بیماریوں سے متاثر ہونیوالے ہم وطنوں کو مفت ادویات سمیت طبی سہولیات فراہم کریں گے۔دین دسترخوان کے زیراہتمام مصیبت زدہ ہم وطنوں کوپانی سمیت خوراک مہیاکی جائے گی۔
 زمینی وآسمانی آفات کی صورت میں اداروں پرتنقید نہیں بلکہ اجتماعی توبہ،تدبراورتدبیر کی ضرورت ہے۔