بھارت کا چاند پر جانا اہم سائنسی فتح، اسرو تعریف کا مستحق ہے: ترجمان دفتر خارجہ

ترجمان دفتر خارجہ ممتاز  زہرا بلوچ نے پڑوسی ملک بھارت کے چاند پر  جانے کو اہم سائنسی فتح قرار  دیتے ہوئے بھارتی سائنسی ادارے اسرو کی تعریف کی ہے۔  ممتاز  زہرا بلوچ  نے ہفتہ وار بریفنگ  کے دوران کہا کہ بھارت کے چاند پر جانے پر بھارتی اسپیس ریسرچ آرگنائزیشن (اسرو ) تعریف کا مستحق ہے۔دوسری جانب ترجمان دفترخارجہ نے بتایا کہ وزیراعظم انوار الحق کاکڑ نے کل وزارت خارجہ کا دورہ کیا  تھا جس دوران وزیراعظم کو پاکستان کے دیگر ممالک کے ساتھ تعلقات پر بریفنگ دی گئی، وزیراعظم انوارالحق کاکڑ نے وزارت خارجہ کو اپنا خارجہ پالیسی کا تصور دیا اور نگران وزیراعظم نے وزارت خارجہ اور بیرونی مشنز کو اوورسیز پاکستانیوں کو سہولیات دینے کی ہدایات جاری کیں۔ ترجمان دفترخارجہ کے مطابق سعودی عرب کے وزیر حج نےگزشتہ ہفتے پاکستان کا دورہ کیا، سعودی وزیرحج سے پاکستانی زائرین کو حج و عمرہ میں سہولیات دینےکے امور  پربات چیت  ہوئی اور  سول ایوی ایشن اتھارٹی اور حکومت پاکستان کے درمیان حج کے حوالے سے معاہدہ بھی ہوا۔ بھارت کی جانب سے ایک بار  پھر لائن آف کنٹرول کی خلاف ورزی پر ترجمان دفترخارجہ نے کہا کہ ایل او سی پر بھارتی اشتعال انگیزی سے ایک 60 سال کا شہری شہید ہوا، بھارت نے فائرنگ کرکے دونوں ملکوں کے درمیان 2003کے معاہدےکی خلاف ورزی کی۔ممتاز زہرا بلوچ کا کہنا تھا پاکستان نے اس واقعے پر بھارت سے سخت الفاظ میں احتجاج کیا اور پاکستان نے  بھارت کو سیز فائر معاہدے پر عمل کرنے پر زور دیا۔ایک سوال کے جواب میں ترجمان دفتر خارجہ کا کہنا تھا  پاکستان کی بھارت میں شیڈول کرکٹ ورلڈ کپ میں شرکت کی تفصیلات پاکستان کرکٹ بورڈ طےکر رہا ہے۔ابھرتی ہوئی معیشتوں کی تنظیم برکس سے متعلق ترجمان دفتر  خارجہ نے کہا کہ جنوبی افریقا میں ہونے والی برکس سمٹ کی پیشرفت سے پاکستان آگاہ ہے لیکن  پاکستان نے برکس بلاک میں شمولیت کے لیےکوئی درخواست نہیں دی۔ممتاز زہرا بلوچ کا کہنا تھا برکس کو عالمی امن و یکجہتی کے لیے کام کرنا چاہیے اور برکس کا فورم کثیرالملکی ہونا چاہیے۔