پاکستان کو فلڈ ریلیف کیلئے 215 ملین ڈالرز فراہم کئے: ترجمان امریکی سفارتخانہ

اسلام آباد (آئی این پی ) پاکستان میں امریکی سفارتخانے کی ترجمان جوناتھن لالی نے کہا ہے کہ 2022 کے سیلاب نے لاکھوں پاکستانیوں کی زندگی کو متاثر کر دیا‘ امریکا نے فلڈ ریلیف اور بحالی کیلئے 215 ملین ڈالرز فراہم کئے۔ 100 ملین ڈالرز غذائی قلت سے نمٹنے کیلئے دیئے گئے، آج بھی لاکھوں پاکستانیوں کی زندگیاں غذائی قلت کے باعث خطرے سے دو چار ہیں۔ ریلیف پروگرام کیلئے ورلڈ فوڈ پروگرام سے مل کر کام کیا گیا، 1 لاکھ 35 ہزار بچوں کو ایمرجنسی غذائی ریلیف فراہم کیا گیا۔ 74 ہزار سے زائد حاملہ خواتین کی دیکھ بھال کی گئی‘ صحت کی سہولتوں کیلئے بلوچستان اور سندھ میں 12 نیوٹریشن مراکز قائم کئے گئے‘ رواں سال امریکی سفیر نے مزید 486 ٹن فوڈ 39 ہزار بچوں کیلئے فراہم کیا۔ جوناتھن لالی نے یہ بھی کہا کہ مجموعی طور پر 3 لاکھ 17 ہزار خواتین اور بچوں کو مدد فراہم کی گئی، امریکا اس اہم معاملے پر پاکستان کے ساتھ کام جاری رکھے گا۔