مانسہرہ میں 2 بم دھماکے پولیس اہلکار جاں بحق‘ 10 افراد زخمی

مانسہرہ (نامہ نگار) مانسہرہ پولیس لائن روڈ پر یکے بعد دیگرے دو بم دھماکے ہوئے‘ ایک پولیس اہلکار جاں بحق‘ 10 افراد زخمی ہو گئے۔ پولیس ایمبولینس اور موبائل پولیس لائن روڈ سے گزری تو بم کا زوردار دھماکہ ہوا۔ جس کے نتیجہ میں پاس سے گزرنے والی سوزوکی گاڑی 5160 سی ایبٹ آباد کو شدید نقصان پہنچا ڈرائیور سمیت 8 مسافر زخمی ہوئے۔ دھماکہ کی ایف آئی آر نامعلوم ملزمان کے خلاف تھانہ سٹی مانسہرہ میں درج کر دی گئی۔ مانسہرہ پولیس لائن روڈ پر 5 گھنٹے بعد دوسرا دھماکہ ہوا جس میں ایک پولیس اہلکار شہید اور ایک زخمی ہو گیا جبکہ ایک راہگیر بھی شدید زخمی ہوا۔ پولیس ڈرائیور کانسٹیبل اورنگزیب لالہ جاں بحق ہو گیا جس کا سر جسم سے کئی فٹ دور جا گرا۔ ساتھ بیٹھے کانسٹیبل ساجد سب انسپکٹر چنن خان، ایک راہگیر محمد سلیم شدید زخمی ہو گئے۔ پولیس نے سرچ آپریشن شروع کر دیا۔ ڈی پی او مانسہرہ کے مطابق 18 سے زائد مشتبہ افراد کو گرفتار کر لیا گیا۔ دریں اثناء آئی این پی کے مطابق دھماکے میں 3 افراد جاں بحق ہوئے۔