لاہور (سپورٹس رپورٹر) لاہور پولو کلب کے زیراہتمام سامبا بینک لاہور اوپن پولو چیمپئن شپ 2017ء کے چھٹے روز دو دلچسپ میچز کھیلے گئے۔ پہلے میچ میں ڈائمنڈ پینٹس نے گرین آرچرڈ /ریجاس کو5-4 سے جبکہ دوسرے میچ میں الائیڈ بینک نے میٹرو حبیب لائنز /ماسٹر پینٹس کو 7-6 سے ہر ادیا۔ تفصیلات کے مطابق لاہور پولو کلب میں ساما بینک لاہور اوپن پولو چیمپئن شپ 2017ء میں میچز جاری ہیں۔ پہلے میچ میں ڈائمنڈ پینٹس اور گرین آرچرڈ /ریجاس کے درمیان زبردست مقابلہ ہوا۔ پہلے تین چکرز تک ڈائمنڈ پینٹس نے برتری حاصل کی رکھی چوتھے چکر میں گرین آرچرڈ/ریجاس کی طرف سے میچ برابر کرنے کی بھرپور کوشش کی گئی مگر وہ ایک گول سے میچ ہار گئے۔ دوسرے میچ میں الائیڈ بینک نے آخری لمحات میں گول کرکے میٹرو حبیب لائنز /ماسٹر پینٹس سے میچ چھین لیا۔ پہلے چکر میں دونوں ٹیموں نے دو دو گول سکور کیے۔ دوسرے اور تیسرے چکر میں دونوں ٹیموں نے ایک ایک گول سکور کیا۔ چوتھے چکر میں الائیڈ بینک نے تین جبکہ میٹرو حبیب لائنز /ماسٹر پینٹس نے دو گول سکور کیے۔ آج بروز پیر 25 دسمبر کو دوپہر تین بجے آرمی کا میچ نیوایج سے ہوگا۔