کراچی (اسٹاف رپورٹر)کراچی کے علاقے گلستان جوہر میں گھر کی بالکونی پر کھڑی کینیڈین نیشنل خاتون گولی لگنے سے جاں بحق ہوگئی، واقعہ کے وقت علاقے کے کچھ لوگ ہوائی فائرنگ کر رہے تھے۔جاں بحق خاتون کے پڑوسیوں نے بتایا کہ عرفانہ اپنی بہن کے گھر کینیڈا سے آئی تھی، مقتولہ کی بہن رہائشی عمارت کے سیکنڈ فلور پر فلیٹ میں رہائش پذیر تھیں۔عرفانہ فلیٹ کی بالکونی پر کھڑی تھی کہ اس دوران علاقے کے کچھ لوگ ہوائی فائرنگ کر رہے تھے، گولی بالکونی میں کھڑی کینیڈین نیشنل خاتون کو لگ گئی جسے زخمی حالت میں اسٹیڈیم روڈ پر واقع نجی اسپتال منتقل کیا جارہا تھا کہ وہ دم توڑ گئی۔مقتولہ کی اتوارکو کینیڈا واپسی کی فلائٹ تھی، پولیس نے جائے وقوعہ پر پہنچ کر شواہد اکٹھے کرکے کارروائی شروع کردی ہے۔بیوی کے قتل کی خبر سن کر مقتولہ کا شوہر کینیڈا سے پاکستان کے لیے روانہ ہوگیا۔
 خاتون جاں بحق