کراچی جانے والی زائرین بس میں آتشزدگی‘ 2 مسافر جھلس کر جاں بحق‘ متعدد زخمی

حب (نوائے وقت رپورٹ) شاہ نورانی سے کراچی آنے والی زائرین کی بس کو ساکران کے قریب آگ لگ گئی۔ ریسکیو ذرائع کے مطابق بس میں آگ لگنے کا حادثہ کراچی سے 30 کلو میٹر دور حب ڈیم کے علاقے میں پیش آیا، آتشزدگی کے نتیجے میں 2 افراد جاں بحق اور متعدد مسافر جھلس کر زخمی ہوگئے جبکہ  دیگر کو بچا لیا گیا۔ ذرائع کے مطابق بس حادثے میں جھلس کر زخمی ہونے والوں میں خاتون اور بچے شامل ہیں۔ زخمیوں کو پرائیویٹ گاڑیوں میں کراچی کی طرف روانہ کر دیا گیا ہے۔ ڈھانچے سے نعشیں نکال لی گئیں۔ ذرائع کا کہنا ہے کہ تیز رفتاری کے دوران آگ بس کا انجن گرم ہونے سے لگی جس سے بس مکمل جل گئی۔