خضدار+ لاہور+ پشاور (نیوز ایجنسیاں+ سٹاف رپورٹر+ نوائے وقت رپورٹ) ضلع خضدار کی تحصیل نال میں گھر میں دھماکہ خیز مواد پھٹنے سے 7 افراد جاں بحق اور 12 زخمی ہوگئے۔ جاں بحق افراد میں 3 خواتین اور 2 بچے شامل ہیں۔ لیویز ذرائع کے مطابق بدھ کو ضلع خضدار کی تحصیل نال میں گھر میں رکھا ہوا دھماکہ خیز مواد پھٹ گیا۔ فرنٹیئر کور بلوچستان اور حساس ادارے نے پنجگور کے علاقے سریکوران اور گر مکان میں کارروائی کرتے ہوئے کالعدم تنظیم سے تعلق کے شبہ میں 4 مشتبہ افراد جبکہ سبی بازار میں کارروائی کے دوران کالعدم تنظیم بی ایل اے سے تعلق کے شبہ میں 2 مشتبہ افراد گرفتار کر لئے۔ محکمہ انسداد دہشت گردی نے چارسدہ میں کارروائی کرتے ہوئے دہشت گرد فیصل کو گرفتار کر لیا جس کے قبضہ سے دستی بم برآمد ہوا ہے۔ راولپنڈی میں سکیورٹی اداروں نے پی ٹی سی ایل کالونی اور آر اے بازار راولپنڈی میں سرچ آپریشن کیا۔ لاہور میں سی ٹی ڈی نے 3 مشتبہ افراد کو گرفتار کر لیا۔ گرفتار افراد کو کالعدم تنظیم سے تعلق کے شبہ میں گرفتار کیا گیا۔ گرفتار ہونیوالوں میں عبدالستار، عبدالحئی اور مصباح شامل ہیں۔