دوسرا ٹیسٹ ‘ہیری بروک ‘جوروٹ کی  شاندار سنچریاں

لاہور(سپورٹس ڈیسک)ہیری بروک اور جوروٹ کی ناقابل شکست سنچریوں کی بدولت انگلینڈ نے نیوزی لینڈ کے خلاف دو میچوں کی سیریز کے دوسرے اور آخری ٹیسٹ میچ کے پہلے روز اپنی پہلی اننگز میں 3وکٹوں پر 315رنز بنا لئے۔دونوں ٹیموں کے درمیان جمعہ کو دوسرا اور آخری ٹیسٹ میچ شروع ہوا تو کیوی کپتان ٹم سائوتھی نے ٹاس جیت کر پہلے فیلڈنگ کا فیصلہ کیا۔ انگلینڈ کی پہلی تین وکٹیں 21 کے مجموعی سکور پر گر گئی۔ زیک کرائولی 2، اولی پاپ 10 اور بین ڈکٹ 9 رنز بناکر پویلین لوٹ گئے۔ ہیری بروک اور جوروٹ نے نہ صرف ناقابل شکست سنچریاں سکور کیں بلکہ پہلی تین وکٹیں 21 کے مجموعی سکور پر گرنے کے بعد انتہائی شاندار انداز میں بیٹنگ کرتے ہوئے چوتھی وکٹ پر 294 کی شراکت داری قائم کرتے ہوئے ٹیم کے مجموعی سکور کو 315 رنز پر پہنچا کر میچ میں پوزیشن بہتر بنادی۔ ہیری بروک ناقابل شکست 184 اور جوروٹ ناقابل شکست 101رنز کیساتھ ناٹ آئوٹ ہیں۔ میٹ ہنری نے 2 اور ٹم سائوتھی نے ایک کھلاڑی کو آئوٹ کیا۔