کراچی (اسٹاف رپورٹر) کراچی ثانوی تعلیمی بورڈ کراچی میں ہر سال کی طرح امسال بھی سالانہ ہفتہ طلبا کا انعقاد کیا جا رہا ہے یہ پروگرام یکم مارچ سے 9مارچ2023 تک بورڈ کی سماعت گاہ میں صبح 10بجے  منعقد کیا جائے گا۔ چیئرمین میٹرک بورڈ و انٹر بورڈ کمیٹی آف چیئرمینز پروفیسر سید شرف علی شاہ نے کہا کہ ہم نصابی سرگرمیوں کو فروغ دینا اور طلبا کی صلاحیتوں کو اجاگر کرنا ہماری اولین ترجیحات میں شامل ہے اسی حوالے سے میٹر ک بورڈ سالانہ ہفتہ طلبا کا انعقاد کر رہا ہے۔ اس موقع پر ڈائریکٹر ایجوکیشنل ریسرچ اینڈ اسپورٹس حور مظہر نے کہا کہ ہم نے جنوری میں ہی بورڈ سے الحاق شدہ گورنمنٹ اور پرائیویٹ اسکولوں کو تفصیلی شیڈول بھیج دیا تھا جس کے بعد تقریبا 160سے زائد اسکولوں نے انٹری فارم بورڈ کے ریسرچ سیکشن میں جمع ہو چکے ہیں۔ ان مقابلہ جات میں صرف نہم و دہم جماعت کے طلبا و طالبات ہی حصہ لینے کے اہل ہوں گے۔ واضح رہے کہ 8مارچ کو شب برات ہونے کی وجہ سے انگلش تقریرمقابلہ اب 13مارچ کو ہوگا۔ تفصیلات کے مطابق یکم مارچ کو مقابلہ حسن قرات(سور الاحزاب کی آیات 45-48)، 2مارچ کو مقابلہ حسن نعت خوانی، 6مارچ کو مقابلہ اردو تقریر عنوان (جو ہو ذوقِ یقین پیداتو کٹ جاتی ہیں زنجیریں)، 7مارچ کو مقابلہ سندھی تقریر عنوان(کوشش کامیابی جی کنجی آھیی)،13مارچ کو مقابلہ انگلش تقریر ،  9مارچ کو مقابلہ ملی نغمات منعقد ہوں گے ان مقابلہ جات میں تین منٹ کا وقت ایک طلبا کو دیا جائے گا۔ان مقابلہ جات میں منصفین کے فرائض متعلقہ شعبہ جات  اساتذہ انجام دیں گے۔ ڈائریکٹر ایجوکیشنل ریسرچ حور مظہر نے مزید کہا کہ طلبا و طالبات مقابلہ جات کے دن اپنے اپنے اسکول یونیفارم اور اسکول کارڈ کے ہمراہ آئیں، طلبا و طالبات کو بورڈ آفس لے کر آنے اور جانے کی ذمہ داری اسکول انتظامیہ کی ہو گی۔