میلبورن میں جاری سال کے پہلے گرینڈ سلام کے نویں روز دفاعی چیمپئن سوئٹزرلینڈ کے روجرفیڈرر نے ہم وطن سٹینی سلاس واورنکا کے خلاف سٹریٹ سیٹس میں بآسانی چھ ایک، چھ تین اورچھ تین سے کامیابی حاصل کی۔ دونوں کھلاڑیوں کے درمیان مقابلہ ایک گھنٹہ اورسینتالیس منٹس تک جاری رہا۔ سیمی فائنل میں فیڈررکا مقابلہ سابق چیمپئن سربیا کے نووک یوکووچ سے ہوگا جنہوں نے چیک ری پبلک کے ٹومس برڈچ کو سٹریٹ سیٹس میں ہرایا۔ دونوں کھلاڑیوں کے درمیان یکطرفہ مقابلے کا سکورچھ ایک، سات چھ اور چھ ایک رہا۔ دوسری طرف خواتین کے مقابلوں میں عالمی نمبرایک ڈنمارک کی کیرولائن ووزنیاکی نے پہلا سیٹ ہارنے کے باوجود اٹلی کی فرانسیسکا شیوون کو ہرا دیا۔ وہ پہلا سیٹ تین چھ سے ہارگئیں لیکن اس کے بعد انہوں نے دونوں سیٹس چھ تین اور چھ تین سے جیت لئے۔ خواتین کے دوسرے کوارٹرفائنل میں چین کی ناہ لی نے جرمنی کی اینڈریا پیٹکووچ کے خلاف سٹریٹ سیٹس میں چھ دو اور چھ دو سے کامیابی حاصل کی۔