لاہور+قصور+ شاہ کوٹ+فیروزوالا (نامہ نگاران+ نمائندہ نوائے وقت) صوبائی دارالحکومت کے مختلف علاقوں میں وارداتوں کے دوران متعدد شہریوں سے لاکھوں روپے مالیت کی نقدی، طلائی زیورات اور دیگر سامان لوٹ لیا گیا جبکہ مزاحمت کرنے پر ایک شہری کو فائرنگ کر کے زخمی کردیاگیا قصور اور شاہ کوٹ میں مقابلوں کے دوران 2 ڈاکو ہلاک ہوگئے جبکہ 4 فرار ہونے میں کامیاب ہوگئے۔ تفصیلات کے مطا بق قائد اعظم انڈسٹریل ایریا میں نعمان اپنی فیملی کے ہمراہ شادی کی تقریب سے واپس آرہا تھا کہ دوڈاکوئوں نے ان سے 3لاکھ کی نقدی ‘ زیورات لوٹنے کے بعد مزاحمت کرنے پرنعمان کو فائرنگ کر کے زخمی کردیا اور فرار ہو گئے ۔ڈاکوؤں نے شفیق آباد امین پارک میں ریاض کے کارخانے میں گھس کرسکیورٹی گارڈز کو گن پوائنٹ پر یرغمال بنا کر دیوار میں نصب سیف توڑ کر 32لاکھ 60ہزارروپے لوٹ لئے ۔ڈاکوؤں نے ہربنس پورہ میں رضو ان کے گھر سے6 لاکھ،لیاقت آباد میں وقا ص کے گھر سے2لاکھ کی نقدی، طلائی زیورات اور دیگر سامان ، نواب ٹائون میں عائشہ سے7 لاکھ کی نقدی، طلائی زیورات اورموبائل فون،ہربنس پو رہ میں آصف سے ایک لاکھ 35ہزار، اقبال ٹائون میں منیب سے ایک لاکھ ،موبائل فون اور موٹرسائیکل ،نشترکالونی میں طیب سے 84ہزار اور موٹرسائیکل، بھاٹی گیٹ میں واحد سے 70ہزار اور موبائل فون،شیراکوٹ میں بلال سے 17ہزاراور موبائل فون لوٹ لیا ہے۔ چوروں نے اقبال ٹائون زینت بلاک میں امجد کے گھر سے 48لاکھ کی نقدی، زیورات اور دیگر سامان چوری کرلیا ۔چوروں نے غازی آباد میںسے عمر ، ریس کورس میں افتخار، مناواں میں الطاف ،شادمان میںسے مبشر کی گاڑیاں جبکہ ٹبی سٹی میں سے امجد،گجر پورہ میںنعمان،شفیق آباد میں عاصم، نشتر کالونی میں واجد،اسلام پورہ میں عابد، مغلپورہ میں ابوبکر، باغبانپورہ شاہ زیب، ڈیفنس اے میں جاوید،جنوبی چھائونی میں منیر،کوٹ لکھپت میں نواز ، کاہنہ میںسے قمر کی موٹرسائیکلیں چوری کر لیں۔ ادھر قصور میں پی ٹی آئی کے رہنما سردار جاوید عاشق ڈوگر اپنے گن مین کے ساتھ کار پر اپنے گائوں جمشیر کلاں آ رہا تھا کہ راستے میں تین موٹرسائیکل سوار ڈاکووں نے انہیں روکا اور ان سے نقدی رقم اور موبائل فون لوٹ لیا اور فرار ہوگئے ، جاوید عاشق ڈوگر اور اسکے گن مین شیر افغان نے انکا پیچھا کیا اور قریبی گائوں والوں کو ڈاکوئوں کی اطلاع دی جس پر پل ڈھارا کے قریب ڈاکوئوں اور دیہاتیوں کا آمنا سامنا ہو گیا فائرنگ کے تبادلے میں ایک ڈاکو موقع پر ہی ہلاک ہو گیا جبکہ اسکے دو دیگر ساتھی فرار ہونے میں کامیاب ہو گئے۔ ادھر شاہ کوٹ صفدرآباد روڈ پر رسولپور آرائیاں کے قریب پولیس اور ڈاکوؤں کے درمیان مقابلہ کے نتیجہ میں ایک ڈاکو ہلاک ہوگیا۔15پر کال چلی کہ نواحی گاؤں ڈلہ موڑ کے قریب ڈاکو ایک شخص سے اسکی موٹر سائیکل چھین کر فرار ہو گئے ہیں جس پر پولیس نے تعاقب شروع کر دیا رسولپور آرائیاں کے قریب پولیس کا ڈاکوؤں سے آمنا سامنا ہوگیا۔پولیس اور ڈاکوؤں کے درمیان مقابلہ ایک گھنٹہ تک جاری رہا جس کے نتیجے میں ایک ڈاکو ہلاک جبکہ دو ڈاکو فرار ہونے میں کامیاب ہو گئے۔ادھر فیروزوالا میں لاہور روڈ کی آبادی میں ڈاکوئوں نے بنک سے رقم لے کر آنے والے شہری وارث کو روک کر پانچ لاکھ روپے کی رقم چھین لی۔