لاہور(کامرس رپورٹر )پاکستان چائنا جوائنٹ چیمبر آف کامرس اینڈ انڈسٹری (PCJCCI) نے پیر کو پاک چائنا جوائنٹ چیمبر آف کامرس اینڈ انڈسٹری کے پلیٹ فارم سے وابستہ چینی تاجروں، کاروباری افراد اور سرمایہ کاروں کو مبارکباد دینے کے لیے نئے سال کی ایک خصوصی تقریب کا اہتمام کیا۔ تقریب کی صدارت پی سی جے سی سی آئی کے صدر معظم گھرکی نے کی جبکہ نائب صدر حمزہ خالد، ایگزیکٹو کمیٹی کے اراکین نے بھی چینی مہمانوں کو مبارکباد دی۔تقریب سے خطاب کرتے ہوئے معظم گھرکی نے کہا کہ چین کے تعاون نے دو دوست ممالک کے درمیان قابل اعتماد تعلقات کو برقرار رکھنے میں اہم کردار ادا کیا ہے۔
انہوں نے کہا کہ پاکستان کا چین کے ساتھ CPEC، ون بیلٹ ون روڈ، ایشین انفراسٹرکچر انویسٹمنٹ بینک (AIIB)، شنگھائی تعاون تنظیم (SCO) اور برکس جیسے قابل ذکر منصوبوں کے لیے ہمسایہ ممالک کے ساتھ اقتصادی اور سیاسی روابط استوار کرنے کا فیصلہ ہے۔انہوں نے مزید کہا کہ اس سال PCJCCI نے آٹھ ممکنہ صنعتی شعبوں میں چین سے سرمایہ کاری لانے کے لیے خصوصی اقدامات کیے ہیں جن میں فرنیچر، دستکاری، ٹیکسٹائل، کھاد، سیمنٹ، گلاس ورک، توانائی اور فارماسیوٹیکل شامل ہیں۔ انہوں نے کہا کہ ان شعبوں کی مشترکہ طور پر پی سی جے سی سی آئی کے اعلیٰ حکام نے نشاندہی کی تھی تاکہ تمام پہلوؤں سے مثبت نتائج سامنے آئیں۔ چینی دوستوں سے خیرسگالی کا اظہار کرتے ہوئے حمزہ خالد نے کہا کہ انہیں یقین ہے کہ پاکستان اور چین کا مضبوط رشتہ دنیا کے سامنے ایک شاندار مثال قائم کرے گا۔ انہوں نے مزید کہا کہ دونوں ممالک کی خوشحالی کے لیے پاکستان اور چین کی مشترکہ کوششوں نے واقعی ایک اچھی مثال قائم کی ہے۔سیکرٹری جنرل صلاح الدین حنیف نے کہا کہ چینی دونوں دوستوں کے درمیان دوستانہ خصلتوں کو مدنظر رکھتے ہوئے بہتر پاکستان کے لیے مزید کردار ادا کریں گے۔ چینی سال نو کی تقریبات کے بعد کیک کاٹا گیا اور پی سی جے سی سی آئی کے ممبران کی جانب سے چینی عوام کو دلی مبارکباد پیش کی گئی۔
