گوادر میں پاکستان نیوی کے ماڈل کالج کے نئے کیمپس کا افتتاح

کوئٹہ (آن لائن)بلوچستان میں فروغِ تعلیم کے لیے پاکستان نیوی کی جانب سے ایک مثبت قدم اْٹھایا گیا ہے۔ترجمان پاک بحریہ کے مطابق گوادر میں پاکستان نیوی کے بحریہ ماڈل کالج کے نئے کیمپس کا افتتاح کردیا گیا ہے، کمانڈر کوسٹ وائس ایڈمرل محمد فیاض جیلانی نے کالج کا افتتاح کیا۔ بحریہ ماڈل کالج کا یہ کیمپس جدید ترین تعلیمی سہولیات سے لیس ہے اور کالج میں 523 طلبا اور طالبات زیر تعلیم ہیں۔ کمانڈر کوسٹ وائس ایڈمرل محمد فیاض جیلانی کا اس موقع پر کہنا تھا کہ پا کستان نیوی ساحلی علاقوں کی ترقی اور ساحلی مکینوں کا معیار زندگی بلند کرنے میں ہمیشہ کوشاں رہی ہے۔ قوم و ملک کی ترقی و خوشحالی میں تعلیم کلیدی حیثیت رکھتی ہے۔ ترجمان پاک بحریہ نے کہا پاک بحریہ نے بحریہ ماڈل اسکول کا آغاز کچھ سال قبل7اساتذہ اور 35 بچوں کے ساتھ کیا تھا اور آج یہ کوشش ایک پرشکوہ عمارت اور ادارے میں تبدیل ہو گئی ہے۔بحریہ ماڈل کالج کی افتتاحی تقریب میں مسلح افواج کے افسران اور مقامی عمائدین نے شرکت کی۔