آزاد کشمیر میں ریفرنڈم، وزیراعظم کا بیان پاکستان کے تاریخی، آئینی موقف سے انحراف: شہباز شریف

لاہور( نیوز رپورٹر)پاکستان مسلم لیگ (ن) کے صدر شہبازشریف نے وزیر اعظم کا کشمیرپر ریفرنڈم کرانے کابیان مسترد کرتے ہوئے کہا ہے کہ عمران نیازی آزاد کشمیر میں ریفرنڈم کی بات کر کے پاکستان کے تاریخی اور آئینی موقف سے انحراف کر رہے ہیں،تنازعہ جموں وکشمیر پر پاکستان کے تاریخی موقف اور اقوام متحدہ کی سلامتی کونسل کی قراردادوں سے ہٹ کر کوئی موقف پوری قوم مسترد کرتی ہے ۔ اپنے بیان میں انہوںنے کہا کہ عمران نیازی کے بیان سے وہ خدشات ثابت ہوگئے ہیں جو 5 اگست 2019 کے بھارتی اقدامات سے قوم کے سامنے پہلے ہی آچکے ہیں ،تنازعہ جموں وکشمیر کا فیصلہ اقوام متحدہ کی نگرانی میںشفاف، آزادانہ استصواب رائے کے ناقابل تنسیخ حق سے ہوگا، پاکستان اور کشمیر کے عوام کا یہی موقف ہے کشمیریوں کی مرضی اور مشاورت کے بغیر کوئی حل ان پر ٹھونسنا بھارت کی مدد کرنا اور کشمیر کاز سے غداری کے مترادف ہے۔ مریم نواز کے لئے استعمال کئے جانے والے الفاط کی مذمت کرتے ہوئے کہا کہ علی امین گنڈا پور نے انتہائی شرمناک زبان استعمال کی۔ علی امین گنڈاپور کے الفاظ عورتوں سے نفرت کی عکاس ہیں،ایسی ذہنیت رکھنے والے 22 کروڑ افراد کے ملک پر حکمرانی کر رہے ہیں۔