ڈیفنس :گھر کے رکھوالے لٹیرے نکلے ،چینی خاتون سے لاکھوں لوٹ کر فرار

لاہور (نامہ نگار) لاہور کے مختلف علاقوں میں ڈاکوئوں اور چوروں نے وارداتوں کے دوران متعدد شہریوں سے لاکھوں روپے مالیت کی نقدی، طلائی زیورات، موبائل فون، گاڑیاں، موٹر سائیکلیں اور دیگر سامان لوٹ لیا ہے۔ ڈیفنس اے کے علاقے میں  رہائش پذیر چینی خاتون جائی زہو کے دو سکیورٹی گارڈز اسامہ اور جواد نے گزشتہ روز اپنی مالکن کو اسلحہ کے زور پر یرغمال بنا کر رسیوں سے باندھا اور گھر کی الماری سے لاکھوں روپے نقدی لوٹ کر فرار ہوگئے۔ پولیس نے دونوں ملزمان  اسامہ اور جواد کو گرفتار کرکے رقم برآمد کرلی ہے۔ ڈاکوؤں نیہڈیارہ میں مشتاق احمدکے گھر گھس کر اہلخانہ سے 5لاکھ 30ہزار روپے، طلائی زیورات، موبائل فون اور دیگر سامان، سمن آباد میں اسد اور اس کی فیملی سے 3لاکھ 85ہزار روپے، نقدی، زیورات، گرین ٹاؤن میں عبداللہ اور اس کی فیملی سے ڈھائی لاکھ روپے نقدی، زیورات، گلشن راوی میں شاہ زمان خان سے 95ہزار روپے، ریس کورس میں عمر سے 55ہزار روپے اور موبائل فون، مانگامنڈی کے علاقہ دبئی گارڈن میں حارث کی دکان سے 45 ہزار روپے اور موبائل فون، شفیق آباد میں وقاص سے 34ہزار روپے اور موبائل فون، لٹن روڈ کے علاقے میں علی سے 28ہزار روپے، راوی روڈ کے علاقے میں منصور سے 17ہزار روپے اور موبائل فون، قلعہ گجر سنگھ میں ہاشم سے 6ہزار روپے لوٹ لئے۔ چوروں نے شاہدرہ ٹاؤن کے علاقے میں احمد کے گھر سے 7لاکھ 60ہزار روپے مالیت کی نقدی ودیگر سامان چوری کر لیا ہے۔ چوروں نے لیاقت آباد، سندر اور مسلم ٹاؤن کے علاقوں سے 3کاریں، شیراکوٹ کے علاقے سے رکشہ جبکہ گلبرگ، مسلم ٹاؤن، ڈیفنس سی، کاہنہ، لوہاری گیٹ، مزنگ، سندر، چوہنگ اور داتا دربار کے علاقوں سے 9موٹر سائیکلیں چوری کر لی ہیں۔
ڈاکے