ریٹائر ہونےوالے3 ڈی ایس پیز،12انسپکٹرز کے اعزاز میں تقریب 

لاہور(نامہ )لاہور پولیس کی جانب سے ریٹائر ہونے والے3 ڈی ایس پیزاور 12انسپکٹرز کے اعزاز میں کیپٹل سٹی پولیس آفس میں تقریب کا انعقاد کیا گیا۔سی سی پی اوبلال صدیق کمیانہ نے ریٹائرڈ ڈی ایس پی محمد جاوید صدیق اور دیگر افسران کو باعزت طریقے سے سروس پوری کرنے پر مبارکباد پیش کی۔ انہوں نے ریٹائرڈ افسران کی خدمات کو خراج تحسین پیش کیا اورآئندہ زندگی کیلئے نیک خواہشات کا اظہار کیا۔سی سی پی او نے ریٹائرڈ افسران کویادگاری شیلڈز اور گلدستے بھی دیئے۔ریٹائرڈ افسران میں لاہور پولیس کے مایہ ناز کرائم فائٹر ڈی ایس پی محمد جا وید صد یق،ڈی ایس پی سید مستحسن علی شاہ،ڈی ایس پی یعقوب اعوان شامل تھے۔تقریب میں ریٹائر ہونے والے انسپکٹرسکندرحیا ت ناگرہ، انسپکٹرمحمد طفیل، انسپکٹرمیا ں انجم، انسپکٹر محمد خالد، انسپکٹرعابد حسین شاہ، انسپکٹر محمدندیم بٹ، انسپکٹرغلام حسین، انسپکٹر محمد شاہد اور انسپکٹر محمد افتخارنے شرکت کی۔بلال صدیق کمیانہ نے کہا کہ ریٹائرڈ ہونے والے پولیس افسران انتہائی باصلاحیت اور پروفیشنل ہیں،ان کی محکمانہ خدمات ہمیشہ یاد رکھی جائیں گی۔فرض شناس اور قابل افسران ریٹائرمنٹ کے بعد بھی محکمہ پولیس کیلئے قیمتی اثاثہ رہیں گے اور ہمارے دروازے ریٹائر ملازمین کے لئے ہمیشہ کھلے ہیں۔ ریٹائرڈ افسران بشمول جاوید صدیق نے سخت محنت، دیانت اور پیشہ ورانہ مہارت سے اپنے فرائض سرانجام دیئے۔یہ افسران آنے والوں کے لئے روشن مثال ہیں اور ہمارے خاموش مجاہدین ہیں جنہوں نے بدمعاش اور قانون شکن افراد کو نکیل ڈال رکھی تھی۔ ریٹائر ہونے والے افسران نے سی سی پی او بلال صدیق کمیانہ کا شکریہ ادا کیا اور کہا کہ محکمہ پولیس کیلئے ہماری خدمات ہمیشہ دستیاب ہوں گی۔