کشکول پھینکنا ہے ، پاکستان کو بحران سے نکال کر دم لینگے : آرمی چیف 

اسلام آباد (خصوصی نامہ نگار) خانیوال ماڈل ایگریکلچر فارم کی افتتاحی تقریب سے آرمی چیف جنرل عاصم منیر نے خطاب کرتے ہوئے کہا ہے کہ پاک فوج کو اپنی قوم کی خدمت کرنے پر فخر ہے، پاک فوج کے شعبہ تعلقات عامہ کے مطابق خانیوال ماڈل ایگریکلچر فارم کی افتتاحی تقریب کے موقع پر آرمی چیف جنرل عاصم منیر نے کہا کہ فوج عوام سے ہے اور عوام فوج سے ہے۔ ہم نے فیصلہ کیا ہے کہ پاکستان کو موجودہ بحران سے نکال کر دم لیا جائے گا۔ آرمی چیف نے مزید کہا کہ پاکستانی غیرت مند ، غیور اور باصلاحیت قوم ہے،تمام پاکستانیوں نے بھکاری کا کشکول باہر ا±ٹھاکر پھینکنا ہے۔آرمی چیف نے کہا کہ اللہ تعالیٰ نے پاکستان کو تمام نعمتوں سے نوازا ہے، ہمیں دنیا کی کوئی طاقت ترقی کرنے سے نہیں روک سکتی۔انشاءاللہ پاکستان میں زرعی انقلاب آکر رہے گا، ہم اس ماڈل فارم کی طرز کے جدید فارم بنائیں گے جس سے چھوٹے کسان کو فائدہ ہوگا اور گرین انیشیٹووکا یہ دائرہ کار پورے پاکستان میں پھیلایا جائے گا۔ آرمی چیف جنرل عاصم منیر نے کہا کہ ریاست ماں کی طرح ہوتی ہے ، عوام اور ریاست کا رشتہ محبت اور احترام کا ہے۔ سکیورٹی اور معیشت کا چولی دامن کا ساتھ ہے، سکیورٹی کے بغیر معیشت اور معیشت کے بغیر سیکیورٹی نا گزیر ہے۔ آرمی چیف نے تقریب کے شرکاکو مخاطب کرتے ہوئے علامہ اقبال کا شعر پڑھ کر ملک و ملت کے ہر فرد کی ملکی ترقی میں اہمیت پر زور دیا۔آرمی چیف نے علامہ اقبال کا شعر پڑھا کہ : 
افراد کے ہاتھوں میں ہے اقوام کی تقدیر
ہر فرد ہے ملت کے مقدر کا ستارہ
 اسلام آباد(خصوصی نامہ نگار)آرمی چیف جنرل عاصم منیر سے کمانڈر امریکی سینٹ کام جنرل مائیکل ایرک کوریلا نے ملاقات کی۔ پاک فوج کے شعبہ تعلقات عامہ کے مطابق آرمی چیف جنرل سید عاصم منیر سے جنرل مائیکل ایرک کوریلا، کمانڈر یونائیٹڈ اسٹیٹس (یو ایس) سینٹکام نے ملاقات کی، جس میں باہمی دلچسپی کے امور، علاقائی سلامتی کی صورتحال اور دفاعی تعاون پر تبادلہ خیال کیا گیا۔ معزز مہمان نے دہشت گردی کے خلاف جنگ میں پاک فوج کی کامیابیوں اور خطے میں امن و استحکام کے لیے پاکستان کی مسلسل کوششوں کو سراہا۔