اسلام آباد (خصوصی نامہ نگار) سربراہ پاک فضائیہ ایئر چیف مارشل ظہیر احمد بابر سدھو نے حمزہ خان کو آسٹریلیا کے شہر میلبورن میں منعقدہ ورلڈ جونیئر سکواش چیمپئن شپ، 2023 جیتنے پر مبارکباد دی۔ ائیر چیف نے 37 برس بعد ٹائٹل پاکستان واپس لانے پر نوجوان چیمپئن کو مبارکباد دی۔ ان کا مزید کہنا تھا کہ اس فتح نے 1986ء میں جان شیر خان کی ورلڈ سکواش چیمپئن شپ میں فتح کی یاد تازہ کر دی۔ انہوں نے اس جیت کو سکواش کے کھیل میں پاکستان کی ایک شاندار واپسی قرار دیا۔ پوری قوم کو اس باصلاحیت کھلاڑی کی شاندار کارکردگی پر فخر ہے جس نے سکواش کے کھیل میں سبز ہلالی پرچم سربلند کیا۔ سربراہ پاک فضائیہ، ائیر چیف مارشل ظہیر احمد بابر سدھو نے بطور صدر پاکستان سکواش فیڈریشن یہ کہا کہ پاک فضائیہ نے ہمیشہ ملک میں سکواش کے فروغ کے لیے بھرپور کردار ادا کیا ہے۔