محکمہ اطلاعات پنجاب کا چائینز لینگوئج کلاسز پلاک کو واپس کرنیکا فیصلہ

لاہور(سیف اللہ سپرا) محکمہ اطلاعات و ثقافت پنجاب نے چائینز لینگوئج کی کلاسز’’چیانگسو‘‘ پلاک کو واپس کرنے کا فیصلہ کر لیا ہے اور آئندہ چند روز میں چیانگسو الحمراء سے پلاک میں شفٹ کردی جائیں گی۔ ذرائع کے مطابق الحمراء میں چائینز لینگوئج کی کلاسز شفٹ ہونے سے حکومت کو ماہانہ لاکھوں روپے کا نقصان ہو رہا تھا اور طلبہ کی تعداد بھی 70سے کم ہو کر صرف 7رہ گئی تھی،یاد رہے کہ سابق وزیر اطلاعات فیاض چوہان نے محکمے کی مخالفت کے باوجود چائینز لینگوئج کی کلاسز پلاک سے الحمراء کے بیسمنٹ میں شفٹ کی تھیں،پلاک میں چائینز لینگوئج کے چار سیشن چلتے تھے اورالحمراء میں صرف ایک سیشن چل رہا تھا، جبکہ طلبہ کی تعداد ستر سے زائد تھی لیکن الحمراء میں کلاسز شفٹ ہونے کی وجہ سے طلبہ کی تعداد صرف سات رہ گئی تھی ذرائع کے مطابق حکومت نے اس نقصان کا نوٹس لے لیا ہے اور سابق وزیر اطلاعات سے وضاحت بھی طلب کرلی ہے۔