امریکہ نے گوانتانا مو  جیل سے افغان  شہری طالبان حکام کے حوالے کر دیا

کابل (آئی این پی) امریکہ نے گوانتاناموبے جیل سے افغان شہری کو رہا کر دیا۔غیر ملکی خبر رساں ادارے کے مطابق ترجمان امارت اسلامیہ افغانستان ذبیح اللہ مجاہد نے ایک ٹویٹ میں کہا ہے کہ امریکہ نے افغان شہری اسد اللہ ہارون کو بدنام زمانہ جیل گوانتانامو بے سے رہا کر کے امارت اسلامیہ کے حوالے کر دیا ہے۔ترجمان نے کہا کہ امارت اسلامیہ افغانستان کی کوششوں کے نتیجے میں آج ہم گوانتانامو جیل سے اسد اللہ ہارون کی رہائی اور برسوں بعد ان کے خاندان کے ساتھ دوبارہ ملنے کا مشاہدہ کر رہے ہیں۔ذبیح اللہ نے کہا ہم اس سلسلے میں زمین ہموار کرنے پر اپنے برادر ملک قطر کا بھی شکریہ ادا کرنا چاہیں گے۔ترجمان کا کہنا تھا کہ امریکا کے ساتھ براہ راست اور مثبت بات چیت کے نتیجے میں گوانتانامو بے میں قید 2 قیدیوں میں سے ایک کی رہائی عمل میں آئی ہے۔انھوں نے ٹویٹ میں لکھا کہ آئی ای اے دوسرے ممالک میں زیر حراست افغانوں کی رہائی کو اپنا فرض سمجھتا ہے، اور اس بات کو یقینی بنانے کی کوشش کرتا ہے کہ کسی بھی ملک میں کوئی افغان مظلوم نہ رہے۔ذبیح اللہ نے کہا ہم ان چند ممالک سے رابطے میں ہیں جہاں افغان باشندوں کو حراست میں لیا گیا ہے اور ان کی جلد رہائی کے لیے کوششیں جاری ہیں۔
گوانتانامو جیل