رہنما پارٹی مضبوط کریں ، انتخابات میں بھر پور تیاری کے ساتھ اتریں گے : بلاول 

اسلام آباد،لاہور (نمائندہ خصوصی+ نامہ نگار) وزیر خارجہ بلاول بھٹو زرداری سے زرداری ہاﺅس اسلام آباد میں راولپنڈی، اٹک، سیالکوٹ، خوشاب، جہلم اور جنوبی پنجاب سے تعلق رکھنے والے رہنماوں نے ملاقاتیں کیں۔ بلاول بھٹو زرداری نے کہا کہ اپنے علاقوں میں پارٹی کو مضبوط کرنے کے لئے کردار ادا کریں۔ ہم عام انتخابات میں بھرپور تیاری کے ساتھ اتریں گے۔ ہمارے پاس بھٹو اور بینظیر بھٹو کا منشور ہے۔ روٹی‘ کپڑا اور مکان ہمارا منشور ہے۔ پاکستان پیپلز پارٹی ملک سے غربت ختم کر کے عوام میں خوشحالی لائے گی۔ ملاقات کے دوران پیر عباس محی الدین نے پیپلز پارٹی کی مکمل حمایت کا اعلان کیا۔ ڈسکہ سیالکوٹ سے سابق ایم پی اے اور سابق تحصیل ناظم اعجاز احمد چھجا بھی پی پی میں شامل ہو گئے۔ چیئرمین پیپلز پارٹی سے جہلم سے PP-25 کے سابق امیدوار راجہ سفیر نے بھی ملاقات کر کے پیپلز پارٹی میں شمولیت کا اعلان کیا۔ جہلم سے تعلق رکھنے والے سابق ایم پی اے ملک جاوید نے مسلم لیگ(ن) چھوڑ کر پیپلز پارٹی میں شمولیت اختیار کی۔ جہلم سے قومی اسمبلی سے سابق امیدوار نذر اقبال نے بھی پاکستان پیپلز پارٹی میں شمولیت اختیار کی۔ PP-82 خوشاب سے سابق امیدوار ملک ذیشان اعوان سابق ایم پی چودھری شوکت نے بھی پیپلز پارٹی میں شمولیت اختیار کی۔