لاہور( سپورٹس رپورٹر ) چیئرمین پی سی بی احسان مانی  نے کہا کہ  پاکستان کرکٹ بورڈ کی روایت ہے کہ  وہ ہر مشکل وقت میں اپنی حکومت کے شانہ بشانہ کھڑا رہا ہے۔ انہوں نے کہاکہ ہماری صوبائی اور وفاقی حکومتوں کے علاوہ ہیلتھ ورکرز کے لیے یہ  ایک مشکل وقت ہے۔چیئرمین پی سی بی  نے کہا کہ وہ اپنے ہیلتھ ورکرز کی صحت اور کامیابی کے لیے دعاگو ہیں تاکہ ہمارا معاشرہ جلد معمول کے مطابق چل سکے اور اس سلسلے میں پی سی بی  نے اپنی طرف سے کورونا وائرس کے خلاف جنگ میں حکومت کا ساتھ دینے کے لیے یہ ایک چھوٹی سی کاوش کی ہے۔احسان مانی  نے کہا انہیں یقین ہے کہ ہمارے معاشرے میں موجود دیگر سخی لوگوں کی طرح پی سی بی کے کئی ملازمین اور کرکٹرز اپنے طور پر حکومتی فنڈ اور دیگر خیراتی اداروں میں عطیات دے رہے ہوں گے۔ انہیں امید ہے کہ یہ تمام افراد کورونا وائرس کے خلاف جنگ میں اپنے طور پر عطیات دینا جاری رکھیں گے۔انہوں  نے مزید کہا کہ ایک قوم کی کامیابی کا اندازہ مشکل حالات میں اس کے اتحاد سے لگایا جاتا ہے اور اس مشکل وقت میں ہم سب کو ایک ہوکر اس وباء کا مقابلہ کرنا ہے۔احسان مانی  نے کہا کہ وہ پاکستان کرکٹ بورڈ کی جانب سے ایک بار پھر پوری قوم سے درخواست کرتے ہیں کہ وہ احتیاطی تدابیر پر مکمل عمل کرے، انہیں اور ان کے پیاروں کو اس وباء سے محفوظ رکھنے کا واحد راستہ احتیاط ہے۔ چیئرمین پی سی بی نے  کہاکہ ہم ایک باہمت قوم ہیں اور انہیں یقین ہے  کہ ہم سب مل کر اس وباء کو شکست دینے کی صلاحیت رکھتے ہیں۔